登船:
本來係6點半登船. 我哋6點到, 條龍已經好長, 好誇張. 點知去到6:45pm點都未開閘安檢. 小豆豆7:30食晚餐, 我本來諗住早半個鐘到, 最遲7:30都可以上到船, 一上船就去主餐廳拎嘢食餵小豆豆, 點知而家咁......我就去問職員, 佢話仲要再等到大約7點先可以開始安檢，排隊尾大約9點前可以上到船。我向職員解釋情況, 職員就安排我帶小豆豆優先登船, 老公就繼續排隊. 所以我7:10am 終於上到船. 老公就8點多先上到黎.
另外, 一上船要自己行上一層樓登記(防火安全條例. 不過其他郵輪都係等所有人上曬船安頓好, 再集合). 我一上船推住bb車又有兩大個袋, 小豆豆又未識行. 完全唔知點樣可以上一層樓, 冇職員幫手, 問又話自己上. 另一個人推住輪椅都好無助, 佢就推開咗個圍欄衝咗入lift. 我就跟住佢先可以上去登記.
食物:
免費餐廰非常難食! 雖然有三間餐廳, 但每個用餐時間只可以去一間,而且只可以入一次, 出咗黎就冇得再入去, 我本來想自己先吃早餐. 待小豆豆醒後再同佢食多次. 呢個限制令我冇得咁做. 上次坐菁英郵輪同加勒比海郵輪的自助餐係24小時任去. 其實三日兩夜的價錢大家差不多, 唔知係咪太多星夢郵輪的遊客都會浪費食物所以有此安排.
另外, 菁英同加勒比海的主餐廳晚餐時間係有劃位安排. 所以一定有得食. 但係星夢郵輪主餐廰就冇劃位安排, 又冇得訂位, 而取票安排非常混亂, 所以我哋最後去自費餐廳食.
因為小豆豆基本上可以食到大部份大人食物, 所以我係自助餐廳見唔太油脷的食物就用熱水浸兩次, 就俾小豆豆食. 飯, 菜同水果都食得好好. 只係每日加半餐肉類的baby food.
房間:
房間望落乾淨, 6呎大床. 三人房有張梳化床. 本來request 咗bb床. 訂位部話冇得confirm 有冇. 去到check in 櫃位都未知有冇, 最後上到房先發現冇. 好彩有張梳化床可以俾小豆豆瞓. 打電話拎梳化床的bed sheet, 等咗半個鐘都未有人黎. 再打去催, 十分鐘後終於有人黎.
另外, 支牙刷用一晚就換多支新, 我諗b6人應該覺得咁先得, 我自已就覺得唔係咁環保.
玩樂設施:
呢樣係唯一值得一讚的! 有五條滑水梯, 三種難度, 我三種都玩曬, 超好玩!!!!!!! 另外, 仲有縄索場, 我係最後5點半冇咁乜太陽先去玩, 排咗二十分鐘. 講解得好清楚, 然後就自己上去揀難度前進, 最後一part係出咗船邊的飛索, 好似飛過海中心咁!! 超級好玩.
仲有一個兒童樂園, 大過兩歲的小朋友可以自己入去玩, 有人看住, 等父母可以有私人時間. 不過小豆豆差兩二天才一歲, 我哋唯有輪流看住小豆豆.
船頭果道係4點左右仲有泡泡池, 不過小豆豆未識行我哋就冇俾佢玩, 其他小朋友玩得好開心!
小豆豆仲細, 其實係房同佢玩枕頭大戰佢已經好開心! 夜晚佢竟然拒絕埋身, 我以為佢自然離乳, 原來佢只係唔想瞓(一埋身就奶睡). 佢零晨醒咗都係要奶奶. =-= 兩夜都搞咗勁耐先肯瞓. 零晨又要奶. 攰死媽媽.
返到屋企又肯奶睡. =-="""
環境:
六七八樓都係賭場, 同時主餐廰又係果道, 我哋要經過賭場先可以去主餐廳, 最大問題係室內竟然可以食煙!!!!!!!!! 真係太差!!!!!!!!!!!! 真係啱曬b6賭鬼. 可以一邊食煙一邊賭錢. 賠錢又貼健康. 真係唔太適合親子遊.
總結:
去玩一次都可以. 但係真係唔會再去. 特別係煙味實在太難頂!!!
*其他旅行日記請按此.
*其他湊b日記請按此
