小學收生

最近幫小豆豆申請幼稚園，順便研究下小學派位方法，官、津小收生三個階段：
官、津小收生同讀邊間幼稚園基本上係完全冇關係

1. 自行收生
每人只可係自行收生報一間學校，當中分兩類：
必收生
兄姐係果間小學讀緊(畢咗業就變咗計分位)或者父母係果間小學工作。
正常學校有50%學位用作統一派位，但係如果某年某某小學有超過30%學額的必收生，咁就會用埋統一派位的學額收必收生，所以未必間間學校都有50%學位用作統一派位(呢個就係點解有啲學位會係自行超收, 因為無論幾多必收生, 學校都要收曬)。
計分位
完全計分制，如果小朋友冇在讀兄弟或在校工作父母就要計分，計分內容如下：
甲類 爸爸或媽媽在該小學的幼稚園部或中學部全職工作，但必須是同一校址。 20分
甲類 哥哥或姊姊在該小學的中學部就讀，但必須是同一校址。 20分
甲類 爸爸或媽媽是該小學的校董。 20分
甲類 爸爸、媽媽、哥哥或姊姊，是該小學的畢業生。 10分
甲類 申請學童是家庭中首名出生的子女。 5分
甲類 以上五項甲類條件也沒有。 0分
乙類 與該校的辦學團體有相同的宗教信仰。 5分
乙類 爸爸或媽媽是該小學主辦社團的成員。 5分
丙類 適齡入學（即九月開學時年滿五歲八個月至七歲）。 10分
所以，基本上每名學生最少有10分，最多35分。
甲、乙類每類只可選一項(即每名學生甲類最高20分，乙類最高5分)，如以上兩項乙類條件也沒有。 0分 　
［好多人以為首名子女再加上父母係畢業生有25分，但係兩者同屬於甲類，所以只有20分，加埋宗教分先有25分］
每間學校有一定自行收生額，視乎必收生人數，50%的位可減去必收生的學額用作自行收生，如果太多必收生，學校都最少會有20%學額用作計分。
計分位由最35分開始收起，再有位就收30分，如此類推，同分數太多人唔夠位分就抽籤。
自行收生結果公怖後，沒有學位的學生便可參加統一派位。留意，取得某些直資學校的學生亦都唔可以參加統一派位。


2. 統一派位
基本上係抽獎遊戲，random俾個number你，跟number派。
甲部係全港學生咁排，唔分地區，佔學校用作統一派位的學位的10%(即大約係全部學額的5%)，跟number先派第一志願，有位再俾第二志願。
甲部派完就派乙部，乙部就跟屋企住址的地區派(不是幼稚園地址!!!!!!一定要係居住地址，同埋灣仔區真係會走黎家訪，朝早7點黎check!!)。淨返的學位(大約係全部學位的45%)，又係random number派。
所以，聽聞填派位表需要有技巧，詳情請參考：https://m.mingpao.com/pns/dailynews/web_tc/article/20160119/s00005/1453140572107
統一派位分甲乙部真係好難明，我睇咗好耐先了解到！

3. 叩門
統一派位結果公佈後，如果派咗去間唔想讀嘅小學，就可以考慮叩門。要有人放棄學位先有位叩門，好多學校都只接受1-1-1，又要整portfolio，又要面試，大概要十項全能先可以叩門成功。事實係咪真係咁恐怖？另外，某啲有附屬幼稚園嘅小學只接受自己幼稚園學生叩門。

join咗媽媽谷，好多媽媽成日問某某幼稚園小一派位如何，除非想報私小、直資或者國際小學，否則根據資料，除咗附屬幼稚園嘅叩門位，官、津小收生同讀邊間幼稚園基本上係完全冇關係。啲人成日吹話贏在起跑線，嚇死一班家長，小朋友咁細個，唔好咁大壓力啦。共勉之。